Ang Departamento sa Panglawas mipadala ug grupo sa mga propisyonal aron makatabang sa mga naluwas sa trahedya sa linog sa lalawigan sa Negros Oriental.
Si DOH-7 regional director Susana Madarieta mibutyag nga adunay 2 ka grupo ang gipadala sa mga apektadong mga lugar nga mao ang Water and Sanitation Team nga maoy moabag sa mga biktima kabahin sa kalimpyo aron malikayan ang mga sakit.
Lain pang grupo nga mao ang Psychosocial Team nga motabang usab sa pag debriefing sa mga apektadong mga pamilya aron kini mahupayan sa gibating kakuyaw.
Ang Water and SAnitation Team gilangkuban kini sa mga doktor ug mga nurse gikan sa DOH-7 ug sa Vicente Sotto Memorial Medical Center.
Matud pa ni Madarieta nga ang medical team nagpabili pa gihapon sa mga apektadong lugar aron mohimo ug pag-kunsulta ug pagpanghatag ug mga tambal ngadto sa mga nanginahanglan.
Ang mga kasagarang sakit nga naka apekto sa mga pasyente mao ang ubo, sip-on, hilanat, hypertension ug labad sa ulo.
Gipahimangnoan usab ni Madarieta ang mga katawhan sa pagpabukal sa mga tubig una kini imnon ug nag-aqpod-apod usab sila ug hydrosol solution aron makatabang sa pag-purify sa ilimnong tubig sa mga evacuation centers.