Ang Department of Trade and Industry (DTI) mimando ug price freeze sa mga lugar nga apektado sa linog sa unang distrito sa lalawigan sa Negros Oriental nunot sa taho nga dunay nahitabong temporaryong pagsaka sa presyo sa mga nanag-unang palaliton.
Dili mominos 44 ka mga tindahan ang namatikdang nagpasaka sa ilang mga presyo agig pagpahimolos sa panghitabo, basi usab sa taho nga nadawat sa buhatan sa DTI.
Niining maong talaan, 12 ka mga tindahan ang nakit-an sa Guihulngan City, 9 sa La Libertad, 5 sa Jimalalud, 4 sa Tayasan ug 14 sa Ayungon. Nagkanayon si DTI regional director Aster Caberte nga iyang gipangunahan ang "diskwento caravan" sa La Libertad ug Jimalalud.
Gidugang pa ni Caberte nga gipadad-an na ug warning ang mga nakasupak sa probisyon sa Price Act, ilabi na sa Section 15. Gimanduan sila sa pag-pabilin sa mga Suggested Ratail Price (SRP) sa mga naasoy nga mga lugar nunot sa kalamidad nga nasinatian.
Gipasabot ni Caberte nga ang calamity diskwento caravan nagtumong nga mapabalik sa normal ang sitwasyon sa supply sa maong mga lugar pinaagi sa pagbubo ug igong supply sa mga nanag-unang palaliton diha sa mga ka-merkadohan.
Matud pa sa DTI nga pipila ka mga distributor ang milambigit sa maong caravan alang sa pagbaligya ug mga sabon, shampoo, cereals, toothpaste, mga ilimnon, kape, noodles, sardinas ug uban pa sa presyo nga ikahatag sa mga distributors.