Sa pinaka-unang higayon, ang Philippine National Police mogamit sa electronic docketing system alang sa mga krimen nga nahitabo sa lalawigan sa Negros Oriental.
Pinaagi sa Electronic Blotter System o ang e-blotter, ang mga krimen nga nabuhat sa lokalidad mahibaloan gilayon ug kini makitaa sa tanang mga buhatan sa kapulisan sa tibuok lalawigan, ug sa dili madugay, sa tibuok rehiyon ug tibuok nasud.
Si Senior Supt. Eduard Caranza ngakanayon nga ang e-blotter system ilusad kini ugmang adlawa ni PNP regional director, Gen. Marcelo Garbo. Ang maong kalihukan magsugod sa usa ka "bisekleta sa kinaiyahan" sa may alas 5:00 sa buntag kung diin ang mga kapulisan mogamit sa mga bisikleta nga molibot sa dakbayan uban sa pagpahibalo nga ang kapulisan mihimo sa ilang pag-proteher sa kalikupan. Usa ka tree planting activity usab ang ipahigayon sa Camanjac uban si Mayor Manuel Sagarbarria.
Matud pa ni Caranza nga pinaagi sa e-blotter system, tanang buhatan sa kapulisan sa lalawigan konektado na. Usa ka computer ang gi-desenyo alang sa pag blotter sa tanang krimen nga diin malambigit ang mga kababayin-an ug mga kabataan.
Ang 27 ka mga computer ipang-apod-apod sa mga buhatan sa kapulisan sa tibuok lalawigan ugmang adlawa. Ang pondo alang niini giabaga sa PNP regional director uban usab sa pag-kumitar sa mga mayor sa lalawigan.
Human unya sa paglusad sa e-blotter system, ang provincila command mo-lusad usab ug "police sa barangay" program sa Dumaguete kung diin adunay mga police supervisors nga ibutang sa mga barangay. Ubos sa maong programa, matud pa ni Caranza, ang mga supervisors makig-koordina sa mga kapitan sa barangay aron ma-mentinar ang kahusay ug kalinaw.