Gipaburan sa korte sa United Kingdom si Grace Ibuna ug Bernardina Arroyo-Tantoco nga sila ang adunay katungod nga modala ug mo-lubong sa patay'ng lawas ni Rep. Iggy Arroyo sa Pilipinas.
Sa usa ka taho, gidapigan ni Justice Peter Smith ang "joint letter of administration" nga gihikay sa korte nila ni Ibuna nga mao ang ulahing gikapuyo ni Arroyo ug Tantoco - ang anak sa kongresista nga maoy naghatag ug otorisasyon sa kabilin ug mga testamento sa magbabalaud.
Sa pagdungog sa Court 31 sa Royal Court of Justice sa London, nahimong klaro sa korte nga ang naglanat nga si Aleli Aroyo nga mao ang legal nga asawa ni Iggy, wala mahinganli sa mga gi-presentang ebidensya nila ni Ibuna ug mga anak ni Rep. Arroyo sa "declaration of trust, special power of attorney, health care directive" ug ang "last will" ni Iggy una kini mamatay.
Ang last will ni Iggy gihimo kini sa Estados Unidos ug nakatala niini nga ang ikaduhang anak niini nga si Arroyo-Tantaco ang "executor" sa last will lakip na niini ang paglubong sa patay'ng lawas sa kongresista ug ang mga nahibiling katigayunan niini.
Matud pa ni Arroyo-Tantoco sa iyang testimoniya nga gawas kaniya, gimando usab sa iyang amahan nga dunay katungod si Ibuna nga mo-desisyon kabahin sa mga hisgutanan sa medikal ug bisan ang paglubong sa lawas sa kongresista.
Mahinumduman nga mihikay ug petisyon ang kampo ni Aleli Arroyo pinaagi sa abogado niini nga si Atty Lorna Kapunan ug mi-adto pa sa London aron kuhaon ang patay'ng lawas sa kongresista, apan gibabagan kini sa korte tungod sa gihikay nga "emergency injunction" ni Ibuna nga maoy nagbabag nga makuha sa JH Kanyon funeral parlor ang patay'ng lawas ni Rep. Arroyo.
Gawas pa niini, naghikay usab si Aleli ug "urgent petition for the custody" sa korte sa Quezon City aron lang gayud makuha ang patay'ng lawas sa bana niini.